Mari-Anne Øksnes mij sov ellen voestes plaatam bæjhkoehtamme lea vihth studijovisnie Audun Austlien luvnie. Daesnie dïhte sov ellen voestes plaatam sïjse spealadamme maam daelie bæjhkoehtamme. EP-plaata Stjernestøv mij luajhtasovvi goevten minngiegietjesne golme laavlomh åtna.
Åssjalommese Idol-tuvresne Tihtelelaavlome Stjernestøv veartenasse bööti akten Idol-tuvren mænngan 2019. Mari-Anne lij joekoen vuartadihks åvtelen edtji scenesne laavlodh Tråantesne, jïh dïhte aaj aajmoem baajnehti bïjlesne gosse Snåaseste vööjin.
– Manne lim joekoen stråarkan.
Audun Austli Mari-Annese soptsesti idtji dïhte daarpesjh mestie akt bïlledh, gaajhkesh leah seamma slaajeste dorjesovveme jïh seamma stoere aarvoem utnieh.
– Gosse limh Røresne Audun munnjien jeehti gaajhkesh mijjieh dorjesovveme naestie-heblijste – aaj doemesjæjjah. Dïhte munnjien skraejriem vedti laavloemasse Stjernestøv, Øksnes soptseste mij lea lohkeme mahte gaajhki naestieguvviej jïh supernovan bïjre. Melodijese leam ohtje viehkiem åådtjeme Hannah Musumistie, mij Ogndalesne orre. Studijovisnie Øksnes meatan utni musihkeridie Jostein Brandtzæg Schei (gitarre/keyboard) jïh Robin Meier Rødsjø (basse/tråammah). Gåabpatjahkh baantesne Døgnvill tjoejehtieh.
Doh göökte jeatjah laavlomh leah «Fly» jïh «Koffer det». Minngemes laavlome lij akte laavlome maam Mari-Anne baantese spealadi jïh eejhtegidie jåvlevadtesinie vedti. Nïejtebe Oline (3) aaj meatan daennie laavloemisnie.
– Dellie aaj filmem darjoejimh mij teekstem laavloemisnie soptseste, Mari-Anne soptseste mij ij tjïekh eejhtegh jåvlevadtesem lyjhkin.
Loeveni
Mari-Anne lea lååvleme mænngan lij onne nïejte. 2010-2011 gellie laavlomh tjeeli gosse almetjejïlleskuvlesne veedtsi, men soptseste satne tjaelemeheaptoem utni doh minngebe gaektsie-uktsie jaepieh. Altese nïekedasse lij studijovisnie mïnnedh men såemies jaepieh veesin åvtelen nïejte Imsdaleste aktem laavlomem sïjse spealadi jïh lööjhti ovmessie sertemedïenesjisnie. Laavlome «Little Boy» englaantengïelesne laavloeji.
– Manne laavenjostoem Auduninie eelkim gosse vadtesekåarhtem aktine biejjine studijovisnie Petteristie (Aasum, ektieårroje red.mïerhk) åadtjoejim. Gosse studijovisnie mïnnim don biejjien manne golme laavlomh sïjse spealadim, Little Boy lij akte dejstie.
– Dehtie biejjeste Mari-Anne lea gïehtelamme.
– Dellie eelkim vihth tjaeledh. Gaajhke loeveni Petteren gaavhtan, Mari-Anne mejjesne jeahta.
– Jïh daelie nöörjen gïelesne?
– Manne iktesth jeenjemes englaantengïelesne tjaaleme. Vielie båadtsode domtoe nöörjengïelesne tjaeledh. Men gosse korona bööti eelkim nöörjen musihkem goltelidh. Dïhte lij joekoen tjaebpie, jïh lea sagke aelhkebe nöörjengïelesne tjaeledh.
Plaatalatjkoe
Plaatasïelte Fajo Music gaskesem veelti Mari-Annine jïh sïjhti dam meatan utnedh sov staellesne. Aarebistie musihkerh staellesne utnieh goh Chand Torsvik jïh Terje Formoe.
– Manne tjoerim ånnetji ussjedidh åvtelen veeljim meatan årrodh. Manne lim maahteme laavlomem olkese vedtedh jïjtje, men im vïenhth P1 lij sïjhteme dam spealedh dellie, Mari-Anne jeahta, maam P1 aadtjen åehpiedehti jïh spealadi. Dïhte aaj jïjnjem hijven viehkiem åådtjeme trööndere-rockeristie Chand Torsvik.
– Hijven naakenem utnedh mij faagem maahta jïh lea væjkele dovne teekstine jïh melodijine.
Sæjhta olkese spealadidh
Mari-Anne stoerre lastoem åtna olkese båetedh spealadidh, men tjuara ånnetji vuertedh dejnie. Mari-Anne jïh Petter sotnen mubpiem maanam vuertieminie suehpeden.
– Ij sån dan jïjnje sjædta daelie, men jaepien 2022 lij luste orreme maam akt buektiehtidh. Sïjhtem jåerhkedh tjaeledh.
– Dov leah njieljie laavlomh ålkone daelie, dellie almetjh maehtieh govledh mejnie datne gïehtelh, Audun tjïerteste.
–Mij lea nïekedasse?
– Im leah naan stoerre nïekedæjja. Men iktesth musihkem lyjhkeme, jïh musihkem meatan åtneme mænngan maanakovresne Kvamesne laavloejim gosse lim njieljien jaepien båeries. Rætnoe monnen leah göökte maanah, fuelhkie voestegh båata. Men nov lea luste orreme Steinkjerfestivaalesne jïh Snåasenjaevrien göölemefestivaalesne årrodh. Tjoerh maaje tjaeledh manne maahtam båetedh gærhkosne laavlodh, dovne juvleminie jïh hïejine, dïhte mejjesne snåasehke jeahta mij plaatam luajhta daelie.